Ālambaṇaṃ mayā dinnaṃ, dvipadindassa tādino.

‘‘Dharaṇiṃ paṭipajjāmi, vipulaṃ sāgarapparaṃ;

Pāṇesu ca issariyaṃ, vattemi vasudhāya ca.

‘‘Kilesā jhāpitā mayhaṃ, bhavā sabbe samūhatā;

Tisso vijjā anuppattā, kataṃ buddhassa sāsanaṃ.

‘‘Ito dvesaṭṭhikappamhi, tayo āsiṃsu khattiyā;

Ekāpassitanāmā te, cakkavattī mahabbalā.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā ālambaṇadāyako thero imā gāthāyo abhāsitthāti.

Ālambaṇadāyakattherassāpadānaṃ paṭhamaṃ.

2. Ajinadāyakattheraapadānaṃ

‘‘Ekattiṃse ito kappe, gaṇasatthārako ahaṃ;

Addasaṃ virajaṃ buddhaṃ, āhutīnaṃ paṭiggahaṃ.

Tena kammena dvipadinda, lokajeṭṭha narāsabha.

Dhāremi antimaṃ dehaṃ, sammāsambuddhasāsane.

Duggatiṃ nābhijānāmi, ajinassa idaṃ phalaṃ.

‘‘Ito pañcamake kappe, rājā āsiṃ sudāyako;

Sattaratanasampanno, cakkavattī mahabbalo.

Itthaṃ sudaṃ āyasmā ajinadāyako thero imā gāthāyo abhāsitthāti.

Ajinadāyakattherassāpadānaṃ dutiyaṃ.

3. Dverataniyattheraapadānaṃ

‘‘Migaluddo pure āsiṃ, araññe kānane ahaṃ;

Addasaṃ virajaṃ buddhaṃ, āhutīnaṃ paṭiggahaṃ.

‘‘Maṃsapesi mayā dinnā, vipassissa mahesino;

Sadevakasmiṃ lokasmiṃ, issaraṃ kārayāmahaṃ.

Duveme ratanā loke, diṭṭhadhammassa pattiyā.

‘‘Tehaṃ sabbe anubhomi, maṃsadānassa sattiyā;

Gattañca mudukaṃ mayhaṃ, paññā nipuṇavedanī.

‘‘Ekanavutito kappe, yaṃ maṃsamadadiṃ tadā;

Duggatiṃ nābhijānāmi, maṃsadānassidaṃ phalaṃ.

‘‘Ito catutthake kappe, eko āsiṃ janādhipo;

Mahārohitanāmo so, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā dverataniyo [dvirataniyo (sī.)] thero imā gāthāyo abhāsitthāti.

Dverataniyattherassāpadānaṃ tatiyaṃ.

Dasamaṃ bhāṇavāraṃ.

4. Ārakkhadāyakattheraapadānaṃ

Ārakkho ca mayā dinno, sugatassa mahesino.

Kuhiñci upapannassa, tāso mayhaṃ na vijjati.

Duggatiṃ nābhijānāmi, vedikāya idaṃ phalaṃ.

‘‘Ito chaṭṭhamhi kappamhi, apassenasanāmako;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ārakkhadāyako thero imā gāthāyo abhāsitthāti.

Ārakkhadāyakattherassāpadānaṃ catutthaṃ.

5. Abyādhikattheraapadānaṃ

‘‘Vipassissa bhagavato, aggisālaṃ adāsahaṃ;

Byādhikānañca āvāsaṃ, uṇhodakapaṭiggahaṃ.

‘‘Tena kammenayaṃ mayhaṃ, attabhāvo sunimmito;

Byādhāhaṃ nābhijānāmi, puññakammassidaṃ phalaṃ.

‘‘Ekanavutito kappe, yaṃ sālamadadiṃ tadā;

Duggatiṃ nābhijānāmi, aggisālāyidaṃ phalaṃ.

‘‘Ito ca sattame kappe, ekosiṃ aparājito [eko āsiṃ narādhipo (syā.)];

Sattaratanasampanno, cakkavattī mahabbalo.

Itthaṃ sudaṃ āyasmā abyādhiko thero imā gāthāyo abhāsitthāti.

Abyādhikattherassāpadānaṃ pañcamaṃ.

6. Aṅkolapupphiyattheraapadānaṃ

Addasaṃ samaṇānaggaṃ, vipassiṃ devasakkataṃ.

‘‘Anubyañjanadharaṃ buddhaṃ, āhutīnaṃ paṭiggahaṃ;

Aṅkolapupphaṃ [vakulapupphaṃ (syā.), bakolapupphaṃ (ka.)] paggayha, buddhassa abhiropayiṃ.

‘‘Ekanavutito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Catusattatito kappe, romaso nāma khattiyo;

Āmukkamālābharaṇo, sayoggabalavāhano.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā aṅkolapupphiyo [vakulapupphiyo (syā.), bakolapupphiyo (ka.)] thero imā gāthāyo abhāsitthāti.

Aṅkolapupphiyattherassāpadānaṃ chaṭṭhaṃ.

7. Sovaṇṇavaṭaṃsakiyattheraapadānaṃ

Vaṭaṃsakaṃ gahetvāna, sovaṇṇaṃ sādhunimmitaṃ.

‘‘Sīghaṃ tato samāruyha, hatthikkhandhagato ahaṃ;

Buddhassa abhiropesiṃ, sikhino lokabandhuno.

‘‘Ekattiṃse ito kappe, yaṃ pupphamabhiropayiṃ;

Duggatiṃ nābhijānāmi, pupphapūjāyidaṃ phalaṃ.

‘‘Sattavīse ito kappe, eko āsiṃ janādhipo;

Mahāpatāpanāmena, cakkavattī mahabbalo.

Itthaṃ sudaṃ āyasmā sovaṇṇavaṭaṃsakiyo thero imā gāthāyo abhāsitthāti.

Sovaṇṇavaṭaṃsakiyattherassāpadānaṃ sattamaṃ.

8. Miñjavaṭaṃsakiyattheraapadānaṃ

Vaṭaṃsakehi ākiṇṇaṃ, bodhipūjaṃ akāsahaṃ.

Duggatiṃ nābhijānāmi, bodhipūjāyidaṃ phalaṃ.

‘‘Ito chabbīsatikappe, ahuṃ meghabbhanāmako;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā miñjavaṭaṃsakiyo thero imā gāthāyo abhāsitthāti.

Miñjavaṭaṃsakiyattherassāpadānaṃ aṭṭhamaṃ.

9. Sukatāveḷiyattheraapadānaṃ

Āveḷaṃ paggahetvāna, rañño dātuṃ vajāmahaṃ.

‘‘Asampattomhi [asampattamhi (sī.), asampattova (?)] rājānaṃ, addasaṃ sikhināyakaṃ;

Haṭṭho haṭṭhena cittena, buddhassa abhiropayiṃ.

‘‘Ekattiṃse ito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

Vebhāro nāma nāmena, cakkavattī mahabbalo.

Itthaṃ sudaṃ āyasmā sukatāveḷiyo thero imā gāthāyo abhāsitthāti.

Sukatāveḷiyattherassāpadānaṃ navamaṃ.

10. Ekavandaniyattheraapadānaṃ

Pasannacitto sumano, buddhaseṭṭhamavandahaṃ.

‘‘Ekattiṃse ito kappe, yaṃ kammamakariṃ tadā;

Duggatiṃ nābhijānāmi, vandanāya idaṃ phalaṃ.

‘‘Catuvīsatikappamhi, vikatānandanāmako;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ekavandaniyo thero imā gāthāyo abhāsitthāti.

Ekavandaniyattherassāpadānaṃ dasamaṃ.

Ālambaṇadāyakavaggo tevīsatimo.

Tassuddānaṃ –

Abyādhi aṅkolaṃ [vakulaṃ (syā.), bakuḷaṃ (ka.)] soṇṇaṃ, miñjaāveḷavandanaṃ;

Pañcapaññāsa gāthāyo, gaṇitā atthadassibhi.