Papañcasamatikkante, tiṇṇasokapariddave.

‘‘Te tādise pūjayato, nibbute akutobhaye;

Na sakkā puññaṃ saṅkhātuṃ, imettamapi [idammattanti (sī.), imetthamapi (ka.)] kenaci.

‘‘Catunnamapi dīpānaṃ, issaraṃ yodha kāraye;

Ekissā pūjanāyetaṃ, kalaṃ nāgghati soḷasiṃ.

Sudhāpiṇḍo mayā dinno, vippasannena cetasā.

‘‘Catunnavutito kappe, yaṃ kammamakariṃ tadā;

Duggatiṃ nābhijānāmi, paṭisaṅkhārassidaṃ phalaṃ.

‘‘Ito tiṃsatikappamhi, paṭisaṅkhārasavhayā;

Sattaratanasampannā, terasa cakkavattino.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā sudhāpiṇḍiyo thero imā gāthāyo abhāsitthāti.

Sudhāpiṇḍiyattherassāpadānaṃ paṭhamaṃ.

2. Sucintikattheraapadānaṃ

‘‘Tissassa lokanāthassa, suddhapīṭhamadāsahaṃ;

Haṭṭho haṭṭhena cittena, buddhassādiccabandhuno.

Bhogo ca vipulo āsi, sayanañca anappakaṃ.

Anubhomi sakaṃ kammaṃ, pubbe sukatamattano.

Duggatiṃ nābhijānāmi, pīṭhadānassidaṃ phalaṃ.

‘‘Aṭṭhatiṃse ito kappe, tayo te cakkavattino;

Ruci uparuci ceva, mahāruci tatiyako.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sucintiko thero imā gāthāyo abhāsitthāti.

Sucintikattherassāpadānaṃ dutiyaṃ.

3. Aḍḍhaceḷakattheraapadānaṃ

‘‘Tissassāhaṃ bhagavato, upaḍḍhadussamadāsahaṃ;

Paramakāpaññapattomhi [paramakāruññapattomhi (syā. ka.)], duggatena [duggandhena (sī.)] samappito.

‘‘Upaḍḍhadussaṃ datvāna, kappaṃ saggamhi modahaṃ;

Avasesesu kappesu, kusalaṃ kāritaṃ mayā.

Duggatiṃ nābhijānāmi, dussadānassidaṃ phalaṃ.

‘‘Ekūnapaññāsakappamhi [ekapaññāsakappamhi (syā.)], rājāno cakkavattino;

Samantacchadanā nāma, bāttiṃsāsuṃ [khattiyāsuṃ (syā. ka.)] janādhipā.

Itthaṃ sudaṃ āyasmā aḍḍhaceḷako thero imā gāthāyo abhāsitthāti.

Aḍḍhaceḷakattherassāpadānaṃ tatiyaṃ.

4. Sūcidāyakattheraapadānaṃ

Sūcidānaṃ mayā dinnaṃ, vipassissa mahesino.

‘‘Vajiraggasamaṃ ñāṇaṃ, hoti kammena tādisaṃ;

Virāgomhi vimuttomhi [vibhavomhi vibhattomhi (ka.)], pattomhi āsavakkhayaṃ.

Ñāṇena viciniṃ sabbaṃ, sūcidānassidaṃ phalaṃ.

‘‘Ekanavutito kappe, sattāsuṃ vajiravhayā;

Sattaratanasampannā, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sūcidāyako thero imā gāthāyo abhāsitthāti.

Sūcidāyakattherassāpadānaṃ catutthaṃ.

5. Gandhamāliyattheraapadānaṃ

Sumanehi paṭicchannaṃ, buddhānucchavikaṃ kataṃ.

‘‘Kañcanagghiyasaṅkāsaṃ, buddhaṃ lokagganāyakaṃ;

Indīvaraṃva jalitaṃ, ādittaṃva hutāsanaṃ.

‘‘Byagghūsabhaṃva pavaraṃ, abhijātaṃva kesariṃ;

Nisinnaṃ samaṇānaggaṃ, bhikkhusaṅghapurakkhataṃ.

‘‘Vanditvā satthuno pāde, pakkāmiṃ uttarāmukho;

Catunnavutito kappe, gandhamālaṃ yato adaṃ.

‘‘Buddhe katassa kārassa, phalenāhaṃ visesato;

Duggatiṃ nābhijānāmi, buddhapūjāyidaṃ phalaṃ.

‘‘Cattārīsamhi ekūne, kappe āsiṃsu soḷasa;

Devagandhasanāmā te, rājāno cakkavattino.

Itthaṃ sudaṃ āyasmā gandhamāliyo thero imā gāthāyo abhāsitthāti.

Gandhamāliyattherassāpadānaṃ pañcamaṃ.

6. Tipupphiyattheraapadānaṃ

Pāṭaliṃ haritaṃ disvā, tīṇi pupphāni okiriṃ.

‘‘Patitapattāni [sattapattāni (sī.), satapattāni (ka.), sukkhapaṇṇāni (syā.)] gaṇhitvā, bahi chaḍḍesahaṃ tadā;

Antosuddhaṃ bahisuddhaṃ, suvimuttaṃ anāsavaṃ.

‘‘Sammukhā viya sambuddhaṃ, vipassiṃ lokanāyakaṃ;

Pāṭaliṃ abhivādetvā, tattha kālaṅkato ahaṃ.

‘‘Ekanavutito kappe, yaṃ bodhimabhipūjayiṃ;

Duggatiṃ nābhijānāmi, bodhipūjāyidaṃ phalaṃ.

‘‘Samantapāsādikā nāma, terasāsiṃsu rājino;

Ito tettiṃsakappamhi [tiṃsatikappamhi (syā.)], cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā tipupphiyo thero imā gāthāyo abhāsitthāti.

Tipupphiyattherassāpadānaṃ chaṭṭhaṃ.

7. Madhupiṇḍikattheraapadānaṃ

Siddhatthaṃ isinaṃ seṭṭhaṃ, āhutīnaṃ paṭiggahaṃ.

Osadhiṃva virocantaṃ, devasaṅghanamassitaṃ.

‘‘Vitti mamāhu tāvade [vitti me pāhunā tāva (sī. syā.)], ñāṇaṃ uppajji tāvade;

Vuṭṭhitassa samādhimhā, madhuṃ datvāna satthuno.

Catuttiṃsamhi kappamhi, rājā āsiṃ sudassano.

‘‘Madhu bhisehi savati, bhojanamhi ca tāvade;

Madhuvassaṃ pavassittha, pubbakammassidaṃ phalaṃ.

Duggatiṃ nābhijānāmi, madhudānassidaṃ phalaṃ.

‘‘Catuttiṃse ito kappe, cattāro te sudassanā;

Sattaratanasampannā, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Madhupiṇḍikattherassāpadānaṃ sattamaṃ.

8. Senāsanadāyakattheraapadānaṃ

‘‘Siddhatthassa bhagavato, adāsiṃ paṇṇasantharaṃ;

Samantā upahārañca, kusumaṃ okiriṃ ahaṃ.

‘‘Pāsādevaṃ guṇaṃ rammaṃ [pāsāde ca guhaṃ rammaṃ (syā.)], anubhomi mahārahaṃ;

Mahagghāni ca pupphāni, sayanebhisavanti me.

‘‘Sayanehaṃ tuvaṭṭāmi, vicitte pupphasanthate;

Pupphavuṭṭhi ca sayane, abhivassati tāvade.

Duggatiṃ nābhijānāmi, santharassa idaṃ phalaṃ.

‘‘Tiṇasantharakā nāma, sattete cakkavattino;

Ito te pañcame kappe, uppajjiṃsu janādhipā.

Itthaṃ sudaṃ āyasmā senāsanadāyako thero imā gāthāyo abhāsitthāti.

Senāsanadāyakattherassāpadānaṃ aṭṭhamaṃ.

9. Veyyāvaccakattheraapadānaṃ

Veyyāvaccakaro āsiṃ, sabbakiccesu vāvaṭo [byāvaṭo (sī. syā.)].

‘‘Deyyadhammo ca me natthi, sugatassa mahesino;

Avandiṃ satthuno pāde, vippasannena cetasā.

‘‘Ekanavutito kappe, veyyāvaccaṃ akāsahaṃ;

Duggatiṃ nābhijānāmi, veyyāvaccassidaṃ phalaṃ.

‘‘Ito ca aṭṭhame kappe, rājā āsiṃ sucintito;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā veyyāvaccako thero imā gāthāyo abhāsitthāti.

Veyyāvaccakattherassāpadānaṃ navamaṃ.

10. Buddhupaṭṭhākattheraapadānaṃ

‘‘Vipassissa bhagavato, ahosiṃ saṅkhadhammako;

Niccupaṭṭhānayuttomhi, sugatassa mahesino.

Saṭṭhitūriyasahassāni, parivārenti maṃ sadā.

Duggatiṃ nābhijānāmi, upaṭṭhānassidaṃ phalaṃ.

‘‘Catuvīse [catunavute (syā.)] ito kappe, mahānigghosanāmakā;

Soḷasāsiṃsu rājāno, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā buddhupaṭṭhāko thero imā gāthāyo abhāsitthāti.

Buddhupaṭṭhākattherassāpadānaṃ dasamaṃ.

Sudhāvaggo dasamo.

Tassuddānaṃ –

Tipupphiyo madhusenā, veyyāvacco cupaṭṭhako;

Samasaṭṭhi ca gāthāyo, asmiṃ vagge pakittitā.

Atha vagguddānaṃ –

Buddhavaggo hi paṭhamo, sīhāsani subhūti ca;

Kuṇḍadhāno upāli ca, bījanisakacinti ca.

Catuddasasatā gāthā, pañcapaññāsameva ca.

Buddhavaggadasakaṃ.

Paṭhamasatakaṃ samattaṃ.