Tatthaddasāsiṃ sambuddhaṃ, devasaṅghapurakkhataṃ.

‘‘Catusaccaṃ pakāsentaṃ, uddharantaṃ mahājanaṃ;

Assosiṃ madhuraṃ vācaṃ, karavīkarudopamaṃ [rutopamaṃ (?)].

‘‘Brahmasarassa munino, sikhino lokabandhuno;

Ghose cittaṃ pasādetvā, pattomhi āsavakkhayaṃ.

‘‘Ekattiṃse ito kappe, yaṃ kammamakariṃ tadā;

Duggatiṃ nābhijānāmi, pasādassa idaṃ phalaṃ.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā saddasaññako thero imā gāthāyo abhāsitthāti.

Saddasaññakattherassāpadānaṃ paṭhamaṃ.

2. Yavakalāpiyattheraapadānaṃ

‘‘Nagare aruṇavatiyā, āsiṃ yavasiko tadā;

Panthe disvāna sambuddhaṃ, yavakalāpaṃ santhariṃ [yavakalāpamavatthariṃ (sī.)].

Mama saṅkappamaññāya, nisīdi yavasanthare.

‘‘Disvā nisinnaṃ vimalaṃ, mahājhāyiṃ vināyakaṃ;

Pāmojjaṃ janayitvāna, tattha kālaṅkato ahaṃ.

Duggatiṃ nābhijānāmi, yavatthare idaṃ phalaṃ.

Itthaṃ sudaṃ āyasmā yavakalāpiyo thero imā gāthāyo abhāsitthāti.

Yavakalāpiyattherassāpadānaṃ dutiyaṃ.

3. Kiṃsukapūjakattheraapadānaṃ

Buddhaṃ saritvā siddhatthaṃ, ākāse abhipūjayiṃ.

‘‘Catunnavutito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Kiṃsukapūjakattherassāpadānaṃ tatiyaṃ.

4. Sakosakakoraṇḍadāyakattheraapadānaṃ

‘‘Akkantañca padaṃ disvā, sikhino lokabandhuno;

Ekaṃsaṃ ajinaṃ katvā, padaseṭṭhaṃ avandahaṃ.

‘‘Koraṇḍaṃ pupphitaṃ disvā, pādapaṃ dharaṇīruhaṃ;

Sakosakaṃ [sakoṭakaṃ (sī. syā.)] gahetvāna, padacakkaṃ apūjayiṃ.

‘‘Ekattiṃse ito kappe, yaṃ kammamakariṃ tadā;

Duggatiṃ nābhijānāmi, padapūjāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sakosaka [sakoṭaka (sī. syā.)] koraṇḍadāyako thero imā gāthāyo abhāsitthāti.

Sakosakakoraṇḍadāyakattherassāpadānaṃ catutthaṃ.

5. Daṇḍadāyakattheraapadānaṃ

Ālambanaṃ karitvāna, saṅghassa adadaṃ ahaṃ.

Ālambanampi datvāna, pakkāmiṃ uttarāmukho.

‘‘Catunnavutito kappe, yaṃ daṇḍamadadiṃ tadā;

Duggatiṃ nābhijānāmi, daṇḍadānassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā daṇḍadāyako thero imā gāthāyo abhāsitthāti.

Daṇḍadāyakattherassāpadānaṃ pañcamaṃ.

6. Ambayāgudāyakattheraapadānaṃ

Vuṭṭhahitvā samādhimhā, bhikkhāya mamupāgami.

‘‘Paccekabuddhaṃ disvāna, ambayāguṃ adāsahaṃ;

Vippasannamanaṃ tassa, vippasannena cetasā.

‘‘Catunnavutito kappe, yaṃ kammamakariṃ tadā;

Duggatiṃ nābhijānāmi, ambayāguyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Ambayāgudāyakattherassāpadānaṃ chaṭṭhaṃ.

7. Supuṭakapūjakattheraapadānaṃ

‘‘Divāvihārā nikkhanto, vipassī lokanāyako;

Bhikkhāya vicaranto so, mama santikupāgami.

Loṇasupuṭakaṃ datvā, kappaṃ saggamhi modahaṃ.

‘‘Ekanavutito kappe, yaṃ puṭakamadāsahaṃ;

Duggatiṃ nābhijānāmi, puṭakassa idaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā supuṭakapūjako thero imā gāthāyo abhāsitthāti.

Supuṭakapūjakattherassāpadānaṃ sattamaṃ.

8. Mañcadāyakattheraapadānaṃ

‘‘Vipassino bhagavato, lokajeṭṭhassa tādino;

Ekaṃ mañcaṃ mayā dinnaṃ, pasannena sapāṇinā.

Tena mañcakadānena, pattomhi āsavakkhayaṃ.

Duggatiṃ nābhijānāmi, mañcadānassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā mañcadāyako thero imā gāthāyo abhāsitthāti.

Mañcadāyakattherassāpadānaṃ aṭṭhamaṃ.

9. Saraṇagamaniyattheraapadānaṃ

‘‘Āruhimha tadā nāvaṃ, bhikkhu cājīvako cahaṃ;

Nāvāya bhijjamānāya, bhikkhu me saraṇaṃ adā.

‘‘Ekattiṃse ito kappe, yañca me saraṇaṃ adā;

Duggatiṃ nābhijānāmi, saraṇāgamane phalaṃ.

Itthaṃ sudaṃ āyasmā saraṇagamaniyo thero imā gāthāyo abhāsitthāti.

Saraṇagamaniyattherassāpadānaṃ navamaṃ.

10. Piṇḍapātikattheraapadānaṃ

Tusitā hi idhāgantvā, piṇḍapātaṃ adāsahaṃ.

‘‘Sambuddhamabhivādetvā, tissaṃ nāma mahāyasaṃ;

Sakaṃ cittaṃ pasādetvā, tusitaṃ agamāsahaṃ.

‘‘Dvenavute ito kappe, yaṃ dānamadadiṃ tadā;

Duggatiṃ nābhijānāmi, piṇḍapātassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā piṇḍapātiko thero imā gāthāyo abhāsitthāti.

Piṇḍapātikattherassāpadānaṃ dasamaṃ.

Saddasaññakavaggo chattiṃsatimo.

Tassuddānaṃ –

Saddasaññī yavasiko, kiṃsukoraṇḍapupphiyo;

Ālambano ambayāgu, supuṭī mañcadāyako;

Saraṇaṃ piṇḍapāto ca, gāthā tālīsameva ca.