Mahesīnaṃ pasādena, padmakesaramokiriṃ.

‘‘Paccekajinaseṭṭhesu, dhutarāgesu tādisu;

Tesu cittaṃ pasādetvā, kappaṃ saggamhi modahaṃ.

‘‘Ekanavutito kappe, kesaraṃ okiriṃ tadā;

Duggatiṃ nābhijānāmi, buddhapūjāyidaṃ phalaṃ.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Padumakesariyattherassāpadānaṃ paṭhamaṃ.

2. Sabbagandhiyattheraapadānaṃ

‘‘Gandhamālaṃ mayā dinnaṃ, vipassissa mahesino;

Adāsiṃ ujubhūtassa, koseyyavatthamuttamaṃ.

‘‘Ekanavutito kappe, yaṃ vatthamadadiṃ [gandhamadadiṃ (syā.)] pure;

Duggatiṃ nābhijānāmi, gandhadānassidaṃ phalaṃ.

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sabbagandhiyo thero imā gāthāyo abhāsitthāti.

Sabbagandhiyattherassāpadānaṃ dutiyaṃ.

3. Paramannadāyakattheraapadānaṃ

Vipassiṃ addasaṃ buddhaṃ, lokajeṭṭhaṃ narāsabhaṃ.

Abhinetvāna sambuddhaṃ, paramannamadāsahaṃ.

‘‘Ekanavutito kappe, paramannamadiṃ [paramannaṃ dadiṃ (sī.), paramannamadaṃ (syā.)] tadā;

Duggatiṃ nābhijānāmi, paramannassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā paramannadāyako thero imā gāthāyo abhāsitthāti.

Paramannadāyakattherassāpadānaṃ tatiyaṃ.

4. Dhammasaññakattheraapadānaṃ

‘‘Vipassino bhagavato, mahābodhimaho ahu;

Rukkhaṭṭhasseva sambuddho, [rukkhaṭṭheyeva sambuddhe (sī.), rukkhaṭṭho iva sambuddho (aṭṭha.) ettha rukkhaṭṭhasseva bodhimahakārajanassa sambuddho catusaccaṃ pakāsetīti atthopi sakkā ñātuṃ] lokajeṭṭho narāsabho [lokajeṭṭhe narāsabhe (sī.)].

‘‘Bhagavā tamhi samaye, bhikkhusaṅghapurakkhato;

Catusaccaṃ pakāseti, vācāsabhimudīrayaṃ.

‘‘Saṅkhittena ca desento, vitthārena ca desayaṃ [desayi (syā.), bhāsati (ka.)];

Vivaṭṭacchado sambuddho, nibbāpesi mahājanaṃ.

‘‘Tassāhaṃ dhammaṃ sutvāna, lokajeṭṭhassa tādino;

Vanditvā satthuno pāde, pakkāmiṃ uttarāmukho.

Duggatiṃ nābhijānāmi, dhammasavassidaṃ phalaṃ.

Sutavā nāma nāmena, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā dhammasaññako thero imā gāthāyo abhāsitthāti.

Dhammasaññakattherassāpadānaṃ catutthaṃ.

5. Phaladāyakattheraapadānaṃ

Tamahaṃ assamaṃ gacchiṃ, phalahattho apekkhavā.

‘‘Vipassiṃ tattha addakkhiṃ, pītaraṃsiṃva bhāṇumaṃ;

Yaṃ me atthi phalaṃ sabbaṃ, adāsiṃ satthuno ahaṃ.

‘‘Ekanavutito kappe, yaṃ phalaṃ adadiṃ tadā;

Duggatiṃ nābhijānāmi, phaladānassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Phaladāyakattherassāpadānaṃ pañcamaṃ.

6. Sampasādakattheraapadānaṃ

‘‘‘Namo te buddha vīratthu, vippamuttosi sabbadhi;

Byasanamhi [byasanaṃ hi (sī.)] anuppatto, tassa me saraṇaṃ bhava’.

‘‘Siddhattho tassa byākāsi, loke appaṭipuggalo;

‘Mahodadhisamo saṅgho, appameyyo anuttaro.

‘‘‘Tattha tvaṃ viraje khette, anantaphaladāyake;

Saṅghe cittaṃ pasādetvā, subījaṃ vāpa [cāpi (sī.), vāpi (syā.)] ropaya.

Mameva anusāsitvā, vehāsaṃ nabhamuggami.

‘‘Aciraṃ gatamattamhi, sabbaññumhi narāsabhe;

Maraṇaṃ samanuppatto, tusitaṃ upapajjahaṃ.

‘‘Tadāhaṃ viraje khette, anantaphaladāyake;

Saṅghe cittaṃ pasādetvā, kappaṃ saggamhi modahaṃ.

‘‘Catunnavutito kappe, pasādamalabhiṃ tadā;

Duggatiṃ nābhijānāmi, pasādassa idaṃ phalaṃ.

Itthaṃ sudaṃ āyasmā sampasādako thero imā gāthāyo abhāsitthāti.

Sampasādakattherassāpadānaṃ chaṭṭhaṃ.

7. Ārāmadāyakattheraapadānaṃ

Sandacchāyesu [sītachāyesu (syā.), santacchāyesu (ka.)] rukkhesu, upāsantesu pakkhisu.

‘‘Addasaṃ virajaṃ buddhaṃ, āhutīnaṃ paṭiggahaṃ;

Ārāmaṃ abhināmesiṃ, lokajeṭṭhaṃ narāsabhaṃ.

‘‘Haṭṭho haṭṭhena cittena, phalaṃ pupphamadāsahaṃ;

Tato jātappasādova, taṃ vanaṃ pariṇāmayiṃ.

‘‘Buddhassa yamidaṃ dāsiṃ, vippasannena cetasā;

Bhave nibbattamānamhi, nibbattati phalaṃ mama.

‘‘Catunnavutito kappe, yaṃ ārāmamadaṃ tadā;

Duggatiṃ nābhijānāmi, ārāmassa idaṃ phalaṃ.

‘‘Sattatiṃse ito kappe, sattāsuṃ mudusītalā;

Sattaratanasampannā, cakkavattī mahabbalā.

Itthaṃ sudaṃ āyasmā ārāmadāyako thero imā gāthāyo abhāsitthāti.

Ārāmadāyakattherassāpadānaṃ sattamaṃ.

8. Anulepadāyakattheraapadānaṃ

‘‘Atthadassissa munino, addasaṃ sāvakaṃ ahaṃ;

Navakammaṃ karontassa, sīmāya upagacchahaṃ.

‘‘Niṭṭhite navakamme ca, anulepamadāsahaṃ;

Pasannacitto sumano, puññakkhette anuttare.

Duggatiṃ nābhijānāmi, anulepassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā anulepadāyako thero imā gāthāyo abhāsitthāti.

Anulepadāyakattherassāpadānaṃ aṭṭhamaṃ.

9. Buddhasaññakattheraapadānaṃ

Vanantaragataṃ santaṃ, lokajeṭṭhaṃ narāsabhaṃ.

‘‘Addasaṃ supinantena, siddhatthaṃ lokanāyakaṃ;

Tattha cittaṃ pasādetvā, sugatiṃ upapajjahaṃ.

‘‘Catunnavutito kappe, yaṃ saññamalabhiṃ tadā;

Duggatiṃ nābhijānāmi, buddhasaññāyidaṃ phalaṃ.

Itthaṃ sudaṃ āyasmā buddhasaññako thero imā gāthāyo abhāsitthāti.

Buddhasaññakattherassāpadānaṃ navamaṃ.

10. Pabbhāradāyakattheraapadānaṃ

‘‘Piyadassino bhagavato, pabbhāro sodhito mayā;

Ghaṭakañca upaṭṭhāsiṃ, paribhogāya tādino.

‘‘Taṃ me buddho viyākāsi, piyadassī mahāmuni;

Sahassakaṇḍo satabheṇḍu [satageṇḍu (syā. ka.)], dhajālu haritāmayo.

Pabbhāradānaṃ datvāna, kappaṃ saggamhi modahaṃ.

‘‘Ito bāttiṃsakappamhi, susuddho nāma khattiyo;

Sattaratanasampanno, cakkavattī mahabbalo.

Itthaṃ sudaṃ āyasmā pabbhāradāyako thero imā gāthāyo abhāsitthāti.

Pabbhāradāyakattherassāpadānaṃ dasamaṃ.

Padumakesaravaggo ekatiṃsatimo.

Tassuddānaṃ –

Kesaraṃ gandhamannañca, dhammasaññī phalena ca;

Pasādārāmadāyī ca, lepako buddhasaññako;

Pabbhārado ca gāthāyo, ekapaññāsa kittitā.