Mandāravaṃ gahetvāna, vipassissa mahesino.

‘‘Samādhinā nisinnassa, matthake dhārayiṃ ahaṃ;

Sattāhaṃ dhārayitvāna, devalokaṃ punāgamiṃ.

‘‘Ekanavutito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā mandāravapupphiyo thero imā gāthāyo abhāsitthāti.

Mandāravapupphiyattherassāpadānaṃ paṭhamaṃ.

2. Kakkārupupphiyattheraapadānaṃ

‘‘Yāmā devā idhāgantvā, gotamaṃ sirivacchasaṃ;

Kakkārumālaṃ [gokkhanumālaṃ (sī.)] paggayha, buddhassa abhiropayiṃ.

‘‘Dvenavute ito kappe, yaṃ buddhamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

Itthaṃ sudaṃ āyasmā kakkārupupphiyo [gokkhanupupphiyo (ka.)] thero imā gāthāyo abhāsitthāti.

Kakkārupupphiyattherassāpadānaṃ dutiyaṃ.

3. Bhisamuḷāladāyakattheraapadānaṃ

Vivekakāmo sabbaññū [sappañño (sī. syā.)], āgañchi mama santike.

‘‘Tasmiṃ cittaṃ pasādetvā, mahākāruṇike jine;

Bhisamuḷālaṃ paggayha, buddhaseṭṭhassadāsahaṃ.

Duggatiṃ nābhijānāmi, bhisadānassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā bhisamuḷāladāyako thero imā gāthāyo abhāsitthāti.

Bhisamuḷāladāyakattherassāpadānaṃ tatiyaṃ.

4. Kesarapupphiyattheraapadānaṃ

Addasaṃ virajaṃ buddhaṃ, caṅkamantaṃ mahāyasaṃ.

‘‘Tīṇi kesarapupphāni [kesaripupphāni (sī.)], sīse katvānahaṃ tadā;

Upasaṅkamma sambuddhaṃ, vessabhuṃ abhipūjayiṃ.

‘‘Ekattiṃse ito kappe, yaṃ kammamakariṃ tadā;

Duggatiṃ nābhijānāmi, buddhapūjāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā kesarapupphiyo thero imā gāthāyo abhāsitthāti.

Kesarapupphiyattherassāpadānaṃ catutthaṃ.

5. Aṅkolapupphiyattheraapadānaṃ

‘‘Padumo nāma sambuddho, cittakūṭe vasī tadā;

Disvāna taṃ ahaṃ buddhaṃ, sayambhuṃ aparājitaṃ [upagacchihaṃ (sī. syā.)].

Upagantvāna sambuddhaṃ, pūjayiṃ padumaṃ jinaṃ.

‘‘Ekattiṃse ito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

Itthaṃ sudaṃ āyasmā aṅkolapupphiyo thero imā gāthāyo abhāsitthāti.

Aṅkolapupphiyattherassāpadānaṃ pañcamaṃ.

6. Kadambapupphiyattheraapadānaṃ

‘‘Suvaṇṇavaṇṇaṃ sambuddhaṃ, gacchantaṃ antarāpaṇe;

Kañcanagghiyasaṅkāsaṃ, bāttiṃsavaralakkhaṇaṃ.

‘‘Nisajja pāsādavare, addasaṃ lokanāyakaṃ;

Kadambapupphaṃ paggayha, vipassiṃ abhipūjayiṃ.

Duggatiṃ nābhijānāmi, buddhapūjāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā kadambapupphiyo thero imā gāthāyo abhāsitthāti.

Kadambapupphiyattherassāpadānaṃ chaṭṭhaṃ.

7. Uddālakapupphiyattheraapadānaṃ

Uddālakaṃ gahetvāna, pūjayiṃ aparājitaṃ.

Duggatiṃ nābhijānāmi, buddhapūjāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā uddālakapupphiyo thero imā gāthāyo abhāsitthāti.

Uddālakapupphiyattherassāpadānaṃ sattamaṃ.

8. Ekacampakapupphiyattheraapadānaṃ

Ekacampakamādāya, upagacchiṃ naruttamaṃ.

‘‘Pasannacitto sumano, paccekamunimuttamaṃ;

Ubhohatthehi paggayha, pūjayiṃ aparājitaṃ.

‘‘Pañcasaṭṭhimhito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

Itthaṃ sudaṃ āyasmā ekacampakapupphiyo thero imā gāthāyo abhāsitthāti.

Ekacampakapupphiyattherassāpadānaṃ aṭṭhamaṃ.

9. Timirapupphiyattheraapadānaṃ

‘‘Candabhāgānadītīre, anusotaṃ vajāmahaṃ;

Addasaṃ virajaṃ buddhaṃ, sālarājaṃva phullitaṃ.

Gahetvā timiraṃ pupphaṃ, matthake okiriṃ ahaṃ.

‘‘Ekanavutito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

Itthaṃ sudaṃ āyasmā timirapupphiyo thero imā gāthāyo abhāsitthāti.

Timirapupphiyattherassāpadānaṃ navamaṃ.

10. Saḷalapupphiyattheraapadānaṃ

Tatthaddasaṃ devadevaṃ, caṅkamantaṃ narāsabhaṃ.

Upasiṅghi mahāvīro, saḷalaṃ devagandhikaṃ.

‘‘Paṭiggahetvā sambuddho, vipassī lokanāyako;

Upasiṅghi mahāvīro, pekkhamānassa me sato.

‘‘Pasannacitto sumano, vanditvā dvipaduttamaṃ;

Añjaliṃ paggahetvāna, puna pabbatamāruhiṃ.

‘‘Ekanavutito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā saḷalapupphiyo thero imā gāthāyo abhāsitthāti.

Saḷalapupphiyattherassāpadānaṃ dasamaṃ.

Mandāravapupphiyavaggo sattatiṃsatimo.

Tassuddānaṃ –

Mandāravañca kakkāru, bhisakesarapupphiyo;

Timiraṃ saḷalañceva, gāthā tālīsameva ca.