18. Kumudavaggo
1. Kumudamāliyattheraapadānaṃ
‘‘Pabbate himavantamhi, mahājātassaro ahu;
Tatthajo rakkhaso āsiṃ, ghorarūpo mahabbalo.
‘‘Kumudaṃ pupphate tattha, cakkamattāni jāyare;
Ocināmi ca taṃ pupphaṃ, balino samitiṃ tadā.
‘‘Atthadassī tu bhagavā, dvipadindo narāsabho;
Pupphasaṅkocitaṃ [pupphaṃ saṅkocitaṃ (sī. syā.), pupphaṃ samocitaṃ (?)] disvā, āgacchi mama santikaṃ.
‘‘Upāgatañca sambuddhaṃ, devadevaṃ narāsabhaṃ;
Sabbañca pupphaṃ paggayha, buddhassa abhiropayiṃ.
‘‘Yāvatā himavantantā, parisā sā [himavantasmiṃ, yāva mālā (syā.)] tadā ahu;
Tāvacchadanasampanno, agamāsi tathāgato.
‘‘Aṭṭhārase kappasate, yaṃ pupphamabhiropayiṃ;
Duggatiṃ nābhijānāmi, buddhapūjāyidaṃ phalaṃ.
‘‘Ito pannarase kappe, sattāhesuṃ janādhipā;
Sahassarathanāmā te, cakkavattī mahabbalā.
‘‘Paṭisambhidā catasso, vimokkhāpi ca aṭṭhime;
Chaḷabhiññā sacchikatā, kataṃ buddhassa sāsanaṃ’’.
Itthaṃ sudaṃ āyasmā kumudamāliyo thero imā gāthāyo abhāsitthāti.
Kumudamāliyattherassāpadānaṃ paṭhamaṃ.
2. Nisseṇidāyakattheraapadānaṃ
‘‘Koṇḍaññassa bhagavato, lokajeṭṭhassa tādino;
Ārohatthāya pāsādaṃ, nisseṇī kāritā mayā.
‘‘Tena cittappasādena, anubhotvāna sampadā;
Dhāremi antimaṃ dehaṃ, sammāsambuddhasāsane.
‘‘Ekattiṃsamhi kappānaṃ, sahassamhi tayo ahuṃ [mahā (sī. syā.)];
Sambahulā nāma rājāno, cakkavattī mahabbalā.
‘‘Paṭisambhidā catasso…pe… kataṃ buddhassa sāsanaṃ’’.
Itthaṃ sudaṃ āyasmā nisseṇidāyako thero imā gāthāyo abhāsitthāti.
Nisseṇidāyakattherassāpadānaṃ dutiyaṃ.
3. Rattipupphiyattheraapadānaṃ
‘‘Migaluddo pure āsiṃ, araññe kānane ahaṃ;
Vipassiṃ addasaṃ buddhaṃ, devadevaṃ narāsabhaṃ.
‘‘Rattikaṃ pupphitaṃ disvā, kuṭajaṃ dharaṇīruhaṃ;
Samūlaṃ paggahetvāna, upanesiṃ mahesino.
‘‘Ekanavutito kappe, yaṃ pupphamabhiropayiṃ;
Duggatiṃ nābhijānāmi, pupphadānassidaṃ phalaṃ.
‘‘Ito ca aṭṭhame kappe, suppasannasanāmako;
Sattaratanasampanno, rājāhosiṃ mahabbalo.
‘‘Paṭisambhidā catasso…pe… kataṃ buddhassa sāsanaṃ’’.
Itthaṃ sudaṃ āyasmā rattipupphiyo thero imā gāthāyo abhāsitthāti.
Rattipupphiyattherassāpadānaṃ tatiyaṃ.
4. Udapānadāyakattheraapadānaṃ
‘‘Vipassino bhagavato, udapāno kato mayā;
Piṇḍapātañca datvāna [gahetvāna (syā.)], niyyādesimahaṃ tadā.
‘‘Ekanavutito kappe, yaṃ kammamakariṃ tadā;
Duggatiṃ nābhijānāmi, udapānassidaṃ phalaṃ.
‘‘Paṭisambhidā catasso…pe… kataṃ buddhassa sāsanaṃ’’.
Itthaṃ sudaṃ āyasmā udapānadāyako thero imā gāthāyo abhāsitthāti.
Udapānadāyakattherassāpadānaṃ catutthaṃ.
5. Sīhāsanadāyakattheraapadānaṃ
‘‘Nibbute lokanāthamhi, padumuttaranāyake;
Pasannacitto sumano, sīhāsanamadāsahaṃ.
‘‘Bahūhi gandhamālehi, diṭṭhadhammasukhāvahe;
Tattha pūjañca katvāna, nibbāyati bahujjano.
‘‘Pasannacitto sumano, vanditvā bodhimuttamaṃ;
Kappānaṃ satasahassaṃ, duggatiṃ nupapajjahaṃ.
‘‘Pannarasasahassamhi, kappānaṃ aṭṭha āsu te [aṭṭha āsayuṃ (ka.)];
Siluccayasanāmā ca, rājāno cakkavattino.
‘‘Paṭisambhidā catasso…pe… kataṃ buddhassa sāsanaṃ’’.
Itthaṃ sudaṃ āyasmā sīhāsanadāyako thero imā gāthāyo abhāsitthāti;
Sīhāsanadāyakattherassāpadānaṃ pañcamaṃ.
6. Maggadattikattheraapadānaṃ
‘‘Anomadassī bhagavā, dvipadindo narāsabho;
Diṭṭhadhammasukhatthāya, abbhokāsamhi caṅkami.
‘‘Uddhate pāde pupphāni, sobhaṃ muddhani tiṭṭhare;
Pasannacitto sumano, vanditvā pupphamokiriṃ.
‘‘Vīsakappasahassamhi, ito pañca janā ahuṃ;
Pupphacchadaniyā nāma, cakkavattī mahabbalā.
‘‘Paṭisambhidā catasso…pe… kataṃ buddhassa sāsanaṃ’’.
Itthaṃ sudaṃ āyasmā maggadattiko thero imā gāthāyo abhāsitthāti.
Maggadattikattherassāpadānaṃ chaṭṭhaṃ.
7. Ekadīpiyattheraapadānaṃ
‘‘Padumuttarassa munino, saḷale bodhimuttame;
Pasannacitto sumano, ekadīpaṃ adāsahaṃ.
‘‘Bhave nibbattamānamhi, nibbatte puññasañcaye;
Duggatiṃ nābhijānāmi, dīpadānassidaṃ phalaṃ.
‘‘Soḷase kappasahasse, ito te caturo janā;
Candābhā nāma nāmena, cakkavattī mahabbalā.
‘‘Paṭisambhidā catasso…pe… kataṃ buddhassa sāsanaṃ’’.
Itthaṃ sudaṃ āyasmā ekadīpiyo thero imā gāthāyo abhāsitthāti.
Ekadīpiyattherassāpadānaṃ sattamaṃ.
Navamaṃ bhāṇavāraṃ.
8. Maṇipūjakattheraapadānaṃ
‘‘Orena himavantassa, nadikā sampavattatha;
Tassā cānupakhettamhi, sayambhū vasate tadā.
‘‘Maṇiṃ paggayha pallaṅkaṃ, sādhucittaṃ manoramaṃ;
Pasannacitto sumano, buddhassa abhiropayiṃ.
‘‘Catunnavutito kappe, yaṃ maṇiṃ abhiropayiṃ;
Duggatiṃ nābhijānāmi, buddhapūjāyidaṃ phalaṃ.
‘‘Ito ca dvādase kappe, sataraṃsīsanāmakā;
Aṭṭha te āsuṃ rājāno, cakkavattī mahabbalā.
‘‘Paṭisambhidā catasso…pe… kataṃ buddhassa sāsanaṃ’’.
Itthaṃ sudaṃ āyasmā maṇipūjako thero imā gāthāyo abhāsitthāti.
Maṇipūjakattherassāpadānaṃ aṭṭhamaṃ.
9. Tikicchakattheraapadānaṃ
‘‘Nagare bandhumatiyā, vejjo āsiṃ susikkhito;
Āturānaṃ sadukkhānaṃ, mahājanasukhāvaho.
‘‘Byādhitaṃ samaṇaṃ disvā, sīlavantaṃ mahājutiṃ;
Pasannacitto sumano, bhesajjamadadiṃ tadā.
‘‘Arogo āsi teneva, samaṇo saṃvutindriyo;
Asoko nāma nāmena, upaṭṭhāko vipassino.
‘‘Ekanavutito kappe, yaṃ osadhamadāsahaṃ;
Duggatiṃ nābhijānāmi, bhesajjassa idaṃ phalaṃ.
‘‘Ito ca aṭṭhame kappe, sabbosadhasanāmako;
Sattaratanasampanno, cakkavattī mahabbalo.
‘‘Paṭisambhidā catasso…pe… kataṃ buddhassa sāsanaṃ’’.
Itthaṃ sudaṃ āyasmā tikicchako thero imā gāthāyo abhāsitthāti.
Tikicchakattherassāpadānaṃ navamaṃ.
10. Saṅghupaṭṭhākattheraapadānaṃ
‘‘Vessabhumhi bhagavati, ahosārāmiko ahaṃ;
Pasannacitto sumano, upaṭṭhiṃ saṅghamuttamaṃ.
‘‘Ekattiṃse ito kappe, yaṃ kammamakariṃ tadā;
Duggatiṃ nābhijānāmi, upaṭṭhānassidaṃ phalaṃ.
‘‘Ito te sattame kappe, sattevāsuṃ samodakā;
Sattaratanasampannā, cakkavattī mahabbalā.
‘‘Paṭisambhidā catasso…pe… kataṃ buddhassa sāsanaṃ’’.
Itthaṃ sudaṃ āyasmā saṅghupaṭṭhāko thero imā gāthāyo abhāsitthāti.
Saṅghupaṭṭhākattherassāpadānaṃ dasamaṃ.
Kumudavaggo aṭṭhārasamo.
Tassuddānaṃ –
Kumudo atha nisseṇī, rattiko udapānado;
Sīhāsanī maggadado, ekadīpī maṇippado;
Tikicchako upaṭṭhāko, ekapaññāsa gāthakāti.
Powered by web.py, Jinja2, AngularJS,